المرجله لو طلها كل هراج # 

رخصة فعايلها وقلة شيمها

الشاعر زعل عايد الرشيدي بهذه الرائعة 

اما تجي بإحراج وتروح بإحراج
وإلا تثمن جيتك وتحشمها

لا تصير دون الحق باب ومزلاج
والقومه الى ترفع الراس قمها

خلك عزيز النفس في كل منهاج
وإن مرتك فرصة زمان أغتنمها

والكلمة الي ما لها طب وعلاج
المحترم يهينها ما احترمها

من لا رقا في بيض الأيام الأبراج
سود الليالي داسته في قدمها

الياس دمعه والرجاء ضحكة احجاج

ونفسك قبل لا تلوم الأيام لمها

الجهل غدرا ليل والحكمة سراج

والخلق شاره والمنايا سهمها

والضيق سجن البال والسجه افراج

وان ضامتك خطو المقاريد ضمها

المرجله لو طلها كل هراج

رخصة فعايلها وقلة شيمها

 لو الرجال تقاس بالبشت والتاج
ما نفرق شيوخ العرب من خدمها

ولو كل من تارد بهقوتك هداج

ما شفت كبد ناشفه من وهمها

ناس فرقها وجودها بين الأمواج
وناس تساوى وجودها مع عدمها

من جرب الحاجه عذر كل محتاج
ناس عطاها الله وناس حرمها

وقت يهيج ويصطفق مثل الأمواج
نبني الأماني والظنون تهدمها

ما عاد يمدي والحكي دونه سياج
لكن تهجا كلمتي و أفتهمها

إما تجي بإحراج وتروح بإحراج
والا تثمن جيتك و إتحشمها